བདེ་སྲུང་བཀའ་བློན་མཆོག་གིས་ཨ་རིའི་ནང་གཞུང་འབྲེལ་འཚམས་གཟིགས་དང་འབྲེལ་བོད་མི་ཚོ་རྡོག་རྩ་ཆིག་སྒྲིལ་གནང་དགོས་པ་གསུངས་འདུག

བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གཟའ་འཁོར་སྔོན་མའི་ནང་། ཨ་རིའི་ནིའུ་ཡོག་ནིའུ་འཇར་སི་ཁུལ་དང་། དེ་བཞིན་རྒྱལ་ས་ཝ་ཤིང་ཀྲོན་དྲི་སི་བཅས་སུ་གཞུང་འབྲེལ་འཚམས་གཟིགས་ལ་ཕེབས་པ་དང་འབྲེལ། ཕྱི་ནང་གཉིས་ཀྱི་འབྲེལ་ཡོད་མི་སྣ་ཁག་གཅིག་མཇལ་འཕྲད་གནང་བ་མ་ཟད། བོད་མི་ཚོས་རྡོག་རྩ་ཆིག་སྒྲིལ་གནང་དགོས་པ་སོགས་ཀྱི་གསུང་བཤད་གནང་འདུག དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ ཟླ་བ་འདིའི་ཚེས་ ༡༠ ནས་ཨ་རིའི་ནང་གི་གཞུང་འབྲེལ་ཕྱོགས་བསྐྱོད་དབུ་འཛུགས་གནང་ཡོད་པ་དང་། ཐོག་མར་ཨ་རིའི་གྲོང་ཁྱེར་ནིའུ་ཡོག་ཏུ་ཕེབས་འབྱོར་གྱིས་ཁུལ་དེའི་ནང་རྟེན་གཞི་བྱས་པའི་འབྲས་སྤུངས་སྒོ་མང་ཆོས་ཚོགས་ཀྱིས་གོ་སྒྲིག་ཞུས་པའི་༸སྐུའི་གོ་སྟོན་སྲུང་བརྩི་ཐོག་དམིགས་བསལ་སྐུ་མགྲོན་དུ་དབུ་བཞུགས་གནང་བ་མ་ཟད། ཚེས་ ༡༡ ཉིན་ནིའུ་ཡོག་དང་ནིའུ་ཇར་སིའི་ལ་ཡོད་པའི་གནད་ཡོད་མི་སྣ་ཁག་ཅིག་དང་མཇལ་འཕྲད་གནང་སྟེ། བོད་ཀྱི་གནད་དོན་ཐོག་བཀའ་བསྡུར་གནང་འདུག ཕྱོགས་མཚུངས་ཚེས་ ༡༢ ཉིན་རྒྱལ་ས་ཝ་ཤིང་ཌོན་ཌི་སི་ Washington DC ལ་ཕེབས་ཐོན་གནང་ཡོད་པ་དང་། སྐབས་དེར་དོན་གཅོད་ལས་ཁུངས་ཀྱི་ལས་བྱེད་དང་། ཡུལ་དེའི་བོད་རིགས་སྤྱི་མཐུན་ཚོགས་པའི་ཚོགས་གཙོ་བཅས་ནས་ཕེབས་བསུ་ཞུས་རྗེས། ཚེས་ ༡༣ ཉིན་ཨ་རིའི་འབྲེལ་ཡོད་མི་སྣ་ཁག་ཅིག་དང་མཇལ་འཕྲད་ཀྱིས་བོད་དོན་ཐོག་བཀའ་བསྡུར་གནང་ཡོད་པ་མ་ཟད། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཙོས་པའི་འབྲེལ་ཡོད་ལས་བྱེད་རྣམ་པ་ཐུག་འཕྲད་ཀྱིས་ཕན་ཚུན་གྲོས་མོལ་གནང་ཡོད་འདུག ཕྱི་ཚེས་ ༡༥ ཉིན་བཀའ་བློན་རྒྱ་རི་སྒྲོལ་མ་མཆོག་གིས་ནིའུ་ཡོག་གྲོང་ཁྱེར་དུ་བྱང་ཨ་རིའི་ཁུལ་གྱི་ས་གནས་མདོ་ཁམས་ཆུ་བཞི་སྒང་དྲུག་གི་ཚོགས་པ་ཁག་དྲུག་དང་། དབུས་མདོ་ཁམས་ཆུ་བཞི་སྒང་དྲུག་ཐུན་མོང་གིས་གོ་སྒྲིག་ཞུས་པའི་མདོ་ཁམས་ཆུ་བཞི་སྒང་དྲུག་གི་དམིགས་བསལ་ཚོགས་ཆེན་གྱི་དབུ་འབྱེད་མཛད་སྒོར་གདན་ཞུས་གནང་བ་ལྟར་ཕེབས་ཡོད་པ་མ་ཟད། མཛད་སྒོའི་གཏམ་བཤད་ཁྲོད། ཨ་རི་དང་རྒྱ་གར་གཞུང་མང་ལ་བཀྲིས་རྗེས་དྲན་ཞུས་པ་དང་འབྲེལ། ཐེངས་འདིའི་དམིགས་བསལ་ཚོགས་ཆེན་དེ་ཉིད་རྒྱལ་བའི་གོ་སྟོན་སྲུང་བརྩི་ཞུ་ཕྱོགས་དང་འབྲེལ་བ་ཆགས་པ་བཞིན། ཆུ་བཞི་སྒང་དྲུག་ངོས་ནས་དེ་སྔ་༸གོང་ས་མཆོག་བཙན་བྱོལ་དུ་གདན་འདེན་ཞུ་བ་ལྟར། མགོན་པོ་གང་ཉིད་མཆོག་མྱུར་དུ་བོད་ལ་གདན་འདྲེན་ཞུ་ཐུབ་པའི་དམ་བཅའ་བརྟན་པོ་ཞིག་བཞག་སྟེ། དེའི་ཐད་ཆོལ་གསུམ་གཅིག་ཏུ་བསྒྲིལ་བའི་ཐོག་ནས་ནུས་པ་མཉམ་སྤུངས་དགོས་པའི་ཞུ་སྐུལ་གནང་འདུག བདེ་སྲུང་བཀའ་བློན་མཆོག་གིས་དེ་བཞིན་ཕྱི་ཚེས་ ༡༦ སྟེ། ཐེངས་འདིའི་ཨ་རིའི་ནང་གི་གཞུང་འབྲེལ་འཚམས་གཟིགས་ཀྱི་ཉིན་མཐའ་མར་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་པའི་༸རྒྱལ་བའི་སྐུ་ཕྱའི་ཞབས་རིམ་གསོག་སྒྲུབ་ཀྱི་འདུས་ཚོགས་སུ་མཉམ་བཞུགས་གནང་སྟེ།  ཞབས་རིམ་ཐོག་ཕེབས་པའི་སེར་སྐྱ་ཡོངས་ལ་འཚམས་འདྲི་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཁམས་གསལ་ཐང་ཡིན་པ་དང་། གང་ཉིད་ཀྱི་དགོངས་དོན་ལྟར་བོད་མི་ཚང་མས་ལས་དོན་ལ་ཧུར་ཐག་གནང་དགོས་པ་མ་ཟད།  ༸རྒྱལ་བའི་བཀའ་གསུངས་ཅི་སྒྲུབ་ཞུས་ན་ཕྱི་ནས་ང་ཚོས་ནུས་ཤུགས་ལ་གཏོར་སྐྱོན་གཏང་ཐུབ་མཁན་སུ་ཡང་ཡོད་མ་རེད་ཅེས་གསུངས་གནང་བ་དང་འབྲེལ། བོད་མི་ཚོས་རྡོག་རྩ་ཆིག་སྒྲིལ་དང་མཉམ་སྤུགས་གནང་རྒྱུ་གལ་ཆེན་ཡིན་པ་གསུངས་འདུག The post བདེ་སྲུང་བཀའ་བློན་མཆོག་གིས་ཨ་རིའི་ནང་གཞུང་འབྲེལ་འཚམས་གཟིགས་དང་འབྲེལ་བོད་མི་ཚོ་རྡོག་རྩ་ཆིག་སྒྲིལ་གནང་དགོས་པ་གསུངས་འདུག appeared first on vot.